Наькъашкара кӀоагаш дӀадукъаш, болх беш латт республике
01.04.2024 12:48
Машинашца леларашта массахана хало еш дола накъашкара кӀоагаш дӀадикъа арабаьннаб цу мугӀарера болхлой. Республикерча ерригача шахьарашка беш ба из болх. Из хоам тха газетага бир наькъий гӀулакхех йолча Министерствон болхлоша.
«Висаитова, Комсомольски оалаш бола Шолжа-Шахьарера ши урам вӀашкаоттача, догӀан хиш дӀаухача кӀоага тӀа йилла решётка хийцар болхлоша укх деношка. Наькъашкара хатараш ма хулла кӀезигагӀа хилийтара тӀехьа кӀоагаш дӀадикъа арабувл къахьегамхой хан-ханнахьа», - йоах министерствера тхога бенача хоамо.
Цул совгӀа, хоттех, нувхех, демах наькъа йистош цӀенъю цар. БӀаьстан денош гучадаьлча, геттара гуш хул кхоачамбоацараш.
