Кагирхой ЦIа дакъа лоацаш хургда Ерригроссийски яхье
ГIалгIай Республикан кагирхой цхьанкхетарий цIа (Магас) яхьедаргда «Кагирхой моттиг» яхача Ерригроссийски кагирхой центре, аьлар «Сердало» газетага вайцигарча кагирхой фусама кулгалхочо Ведажанаькъан Зоврбика.
Цу лоархIамеча кхетаченга ГIалгIайчен кагирхоша кийчо йир видеоматериалаца, иштта гойтамца, цу тIа гуш ба центра болх, цун вахар.
Яхье дакъа лоацаш ба эггара дикагIа кийчо яь йола кагирхой, мехка цхьанкхетараш. Уж хьахоржаш теркалъю кагирхой политика, цар таханара уйлаш, дукхача оагIорахьа уйла е ховш уж хилар, дукхача оагIорахьа центра болх дIабахьа йиш хилар, шоайла бувзам лелабар,цу даькъ тIа «Хьалхарчар болам» яха тоаба хилар, иштта «Дешар» яха Российски юкъарло, «Росси - тароний мохк» яха майда, кхыдола бувзамаш хилар.
«Кагирхой цIа - из я пайда лургбола проекташ хьакхоллаш, Россе хьинар дола ноахал дегIадоаладеш йола мрттиг. Тхона йоккха сийле я федеральни даькъ тIа тхоай центра болх гойтар - из майда боккъонцахьа йола ГIалгIайчен кагирхой тIаозара йола моттиг я»,-аьлар ГIалгIай Республикан кагирхой гIулакхех йолча комитета кулгалхочо Малсаганаькъан Адама.
