Магасерча агломерацех бола болх кийчбергба Дом. РФ
Магас-Наьсарен чуйоагӀа нах баха моттигаш кхотаяра оагӀон (агломераци) болх кийчбергба укх шера хӀама тоадарах йолча института Дом.РФ. Из хоам корреспонденташка бир АО «Дом.РФ» яхача АО шахьара хьал тоадара кулгал деча Финогенов Антона.
Белгалде деза, цу программага гӀолла дӀахьоча балхо дуккхача бахархошта дӀаьхача шерашка пайда бергбараш доаржадергдолга. Кхален экономикан хьал, бахархой хьашташ керте лоацаш, дӀахьу болх говзанчаша. Иштта теркалду вай моттигера Ӏалама хьал, мехкал (климат).
«ГӀалгӀай республика - Магас - Наьсаре кхотаенна нах баха моттигаш хилийтара оагӀонцара боккха, лоархӀаме болх дӀаболабе лаьрхӀа да тхо 2024-ча шера», - белгалдир Финогенов Антона. Иштта хьоахадир, Дербенте, Шолжа-гӀалий тӀа, Оарга тӀа, Буро тӀа, иштта кхыйолча Кавказерча шахьарашка; из болх дӀабахьа хьалхара кийчо еш ба, аьнна. ЛаьрхӀар кхоачашде аьттув баьлча, дуккхача бахархой хьал дикача оагӀорахьа дерзаргда, аьнна хет.
