Вай драмтеатр дакъа лоацаш да, «Къулбехьен сцена» яхача фестивале
Гӏаьбартой-Балкхарой столице ший болх дӏаболабир «Къулбехьен сцена» яхача театра фестивала, из дӏахьоргья ардара бетта 18-ча денга кхаччалца. Цу юкъа, Гӏаьбартой паччахьалкхен драматически А. Шогенцукова цӏерагӏча театре шоай спектаклаш гойтаргья Абзой, Аьдагӏий, Гӏалгӏайчен, Селий мехка, Къарший-Черсий, Къилбаседа Хӏирий, Нохчий, Къулбехьен Хӏирий, Гӏаьбартой-Балкхарой театраша. Вай республика цу фестивале гойтаргья Гӏалгӏай паччахьалкхен драматически театро.
Театра зарбан болх лелабераша яхачох, ардара бетта 14-ча дийнахьа 14 сахьат даьлча, вай тоабо гойтар ший спектакль-белам «Ханума», из оттаяьй А. Цагареле йоазонах.
«Спектакль гойтар гӏалгӏай меттала, цунца цхьана таржам а деш. Оаха бийхабар беррига театра искусство езараш, иштта хьаьший, Гӏаьбартой-Балкхарой Республикан бахархой тхоай спектаклага хьажа. Хьажар мах боацаш дар», - аьлар Гӏалгӏайчен драмтеатре.
