Олимпийски ловзарашка дакъа лоацаш, хилар вай мехкара дзюдоист
02.08.2024 09:16
Бразилера, Нидерландашкара кхаьчача спортсменашца латаш хилар Франце дӀахьоча олимпийски ловзарашка дакъа лоацаш вола, лакха говзал йола вай мехкара дзюдоист. Из хоам «Сердалога» бир спорта оагӀонцарча министерствос.
«Яхьаш дӀайихьар Париже. Хьалхарча латаре Бразилера вена дзюдоист эшавир Къоастой Джафара, бакъда, шозлагӀа латаш хинначунгара котало яккха вӀаштӀехьадаланзар», - йоах тхога кхаьчача хоамо.
Латар чакхдаьнначул тӀехьагӀа, цун дог ураоттадеш дола къамаьл деш, йистхилар цун спорта оагӀон кулгалхо.
«Ишттача йоккхача яхьашка вай мохк дӀахьокха вахар боккха аьттув ба! Дог тийша ва со, тӀехьа тӀайоагӀача хана, цох олимпийски чемпион хургхиларах», - белгалдир цо.
