Шахьара хьал тохкаш хилар единороссаш
«Шахьара хьал» яхача партпроектага гӀолла, Илдарха-ГӀалий тӀара хьал мишта латт хьажа арабаьнна хилар единороссаш. Из хоам тха «Сердалога» бера парте оагӀонгара.
«Шахьарера нах гуллуш йола моттигаш малагӀча хьале латт тахка, арабаьлар горсовета депутаташ бола Баденаькъан Мухьмад, Амаканаькъан Хьусен, Султиганаькъан Ӏарби.
Иштта цар го баьккхар Промыслови, Фрунзе оалача урамашка гӀолла», - йоах тхога бенача хоамо. ГӀадвугаш да, тоаяь латта моттигаш хоза куц долаш, хӀама толхаданза хилар. «ЦаӀ йола Росси», «Шахьарера хьал» яхача проекташка гӀолла боккха болх ба шахьарера моттигаш эргайоахаш бер.
Бахархошца бувзам болаш, тоае еза моттигаш царга шоашка хоржийташ, лелабу из болх. Федеральни, моттигерча Ӏаьдала тӀахьожам болаш, чакхдоаккхаш беркате гӀулакх да из.
