«Ишколера Ӏалама хаьхой» яха болам дӀабихьар вай мехка
27.05.2024 12:35
Ӏаламцара шоай кхетама хьал малагӀча боараме латт тохкаш хилар, Наьсарерча 8 ишколера дешархой, «Ишколера Ӏалама хаьхой» яхача хаттарий ловзаре. Из хоам «Сердалога» бир «Бералла наькъаш» яхача ерригача Россе проекта зарбан болх лелабераша.
«Наьсарерча № 20 йолча ишколе дӀадихьар ловзар. Из гӀулакх дагадехар яр, №14 йолча ишкола кулгалхочун гӀонча йола Кхоартой Фатима. «Совъяьннача хӀамай шоллагӀа вахар» яхача темах, проект кийчъе езаш яр хӀара тоаба хьалххе. Хьоча наькъа лист дӀаенна, цунга гӀолла кхоачашбир бераша шоай болх. Ялх дакъа дар дешархоша цу ловзаре чакхдаккха дезаш, хаттараш тайп-тайпара дар», - йоах тхогарча хоамо. Хьалхарча моттиге хилар Наьсарерча № 1 йолча гимназера «Ӏалама зӀанараш» яха тоаба.
