«Барта йоазув» яхача кхетачен доакъашхо хилар вай мехкахо
Терроризм, экстремизм яхача доккхача зуламех кагирхой лорабарах йолча Ерригача Россе кхетачен доакъашхо вар вай мехка цу оагӏонцара болхло Охценаькъан Ислам. Из хоам «Сердалога» бир «Машук» яхача моттигера.
Пятигорске дӏайихьача йоккхача кхетаче дакъа лоацаш, вай мехкара 89 моттигера цу оагӏонцарча балхах вола 100 саг вар. Кхетачен керттера декхар - цу доккхача зуламашта духьала къовсам лоаттабар кагирхошта юкъе доаржадар.
Иштта цига дийцар къамашта юкъе довнаш леладар, барт бохабеш дола гӏулакхаш доаржадар эггара доккхагӏа дола во долгах. Лакха говзал йолча кхелахошта юкъе волаш болх дӏахьош вар цига вай мехкахо Охценаькъан Ислам а. Тайп-тапарча моттигашка воча гӏулакхашта духьала доаржаде дезараш белгалдир цига.
«Тахан вай дерригаш фийла хила дезаш ха я. Воча гӏулакхех дувцар кхоачам болаш дац, царна духьале ергьяраш, уж дохадергдараш доаржаде деза вай къонача тӏехьен юкъе. Кагирхошца цхьана пайда беш хургйола, тахан эшаш йола проекташ хьакхоллаш, дӏа-хьа йоаржаеш болх дӏабахьа беза», - дийцар Охценаькъан Ислама.
Из кхетаче дӏаяхьа вӏашагӏъеллараш бар Роспатриотцентр, «Машук» яха дешара моттиг.
