3000 совгӀа бахархошта гӀо даьд «Даьхен лорбой» яхача ганза мехкарча филиало
3000 совгӀа болча бӀухошта, цар дезалашта эшачунга хьожаш; болх дӀабихьаб «Даьхен лорбой» яхача ганза мехкарча филиала болхлоша. Из хоам «Сердалога» бир мехкарча Паччахьалкхене. Республикерча министерствошца, кхыйолча моттигашца бувзам лоаттабеш, цу наьха хьашташ кхоачашдара тӀехьа къахьегаш ба филиалера болхлой.
«БӀухоша, цар цӀагӀарча наха тӀакхухьаш дола хаттараш тайп-тайпара да- лаьттан доазув къоастадар, лорашка чакхвалар, санаторе, курорте ваха дегӀа могашал меттаоттае аьттув балар, иштта де доацаш тӀема аренашка байнараш хьалохаш болх дӀабахьар, кхыдола лоархӀаме хаттараш. ХьатӀаухарашта юкъе дукха ба ЖКХ оагӀонца, болх лаха, дезал деша оттабе новкъостал де яхараш. Ганза болхлоша 600 сагагара 848 дехар тохкаш болх чакхбаьккхаб», - дийцар тха газетага. 24 сахьата шоай болх дӀахьош ба ганза къахьегамхой тӀема опреаце доакъашхошца, цар дезалашца бувзам лоаттабеш. Ийшача моттиге оарцагӀбахка кийча ба уж.
ХӀаранена къувлар ше-ший тайпара хул, хӀаьта ганза болхлой декхар - СВО доакъашхой, ветераний, цар цӀагӀарча наьха хьашташ кхоачашдеча могаш дола гӀо дар, уж нах цхьаь ца битар, массахана цар оагӀув хьаллаца кийча болга дӀахайтар.
«Даьхен лорбой» яхача ганза моттигерча филиало доккха дакъа дӀалоац кагирхой политиканна юкъе. Моттигерча ишколашка, вузашка кхетаченаш дӀакхухьаш, кхувш латта тӀехье яхь, денал долаш, Даьхенцара безам лорабеш ураоттаяра тӀехьа къахьег цо. Денала урокаш, ветеранашцара кхетаченаш, тайп-тайпара спортацара къовсамаш, культуран оагӀонцара яхьаш йоаржаю цар кагирхошта юкъе.
