«ГӀалгӀай дувхара поэзи» яха багахбувцама сахьат дӀахьоргда мехка
Республикерча къаман кхоллама ЦӀен болхлой Эбарга-Юртарча культуран цӀенца «ГӀалгӀай дувхара поэзи» яха багахбувцама сахьат дӀадахьа кийчо еш ба. Фольклора Денна хетаяь хургья из сайре.
«Кхетачен керттера декхар - къаман барзкъанца дувзаденна тхьовра денз хьадоагӀа Ӏадаташ, мехкара культура дӀайовзийтар, уж хӀамаш наха юкъе доаржадар. ГӀалгӀай къаман оамалий, Ӏадатий дуне довза аьттув хургба гулбеннача хьаьший», - дийцар «Сердалога» РДНТ кулгалхочун гӀонча йолча Котанаькъан Марема.
Говзанча-модельер йолча Имагожанаькъан Мадинас кийчбаьча гӀалгӀай дувхар дувхача мехкараша гойтаргда, къаман барзкъа мел эздий да. Тхьоврарча ханагара хьадоладенна таханарча денга кхаччалца, мишта хувцалуш хиннад къаман дувхар, малагӀа оагӀув эггара лоархӀамегӀа ба ховргда хьаьшашта.
ХӀара барзкъа хьатегаш теркаме лаьцараш, эггара лоархӀаме хетараш малагӀаш да белгалдергда цига. Цу кхетаче дакъа лоацаш хургья республикера исбахьален оагӀонцара тоаба «Сийг», кулгалхо-хореограф Имагожанаькъан Мухьмад. Ше ма дарра, гӀалгӀай цӀай оттаргда цига, хӀаране дакъа лаца йиш йолаш.
ГӀалгӀай къаман культура, истори, къаьнарча хана денз лорадеш, доаржадеш хьадахьа эздий Ӏадаташ довза, цар истори тахка ловрашта доккха совгӀат хургда цу сайренах.
