«Бакъдолчун тӀехьа» яха ганз СВО доакъашхой берашца ГӀалгӀай мехктохкама музее яхар
Тахан, Малсаганаькъан Тухана цӀерагӀча паччахьалкхен музее, Даьхен лорбой шу хилара чудоагӀаш, дӀайихьар культурно-просветительски, патриотически оагӀон фестиваль. «Бакъдолчун тӀехьа» ганза болх лелаберашца цхьана цига хилар СВО доакъашхой дезал а, цар даьй а.
Бераш гойтамга хьожаш дар, цига царна дукха дайзар гӀалгӀай салтех, тӀом ца латтача къахьегаш хиннача нахах лаьца истореш. Уж цецбаьннабар цига шоашта гуш хиннача тӀема суртех, бӀухоша леладаьча тӀема гӀирсех. Бераша а дийцар шоай даьшта карагӀдаьннар чудоагӀаш дола истореш, яхаш, хоам бу «Сердало» газетага.
«Сийлахь-йоккха Котало йоаккхаш шоай дакъа юкъедихьад ГӀалгӀайчен бахархоша. Республикан дукха бахархой хиннаб Советски эскара мугӀарашка: цар яьккхар Москва, Ленинград, иштта, Сталинградски тӀом дӀахьоча хилар, уж духьалъэттар Курски дукъ тӀа моастагӀчоа, иштта дакъа лоацаш хиннаб Кавказе чувала гӀерташ моастагӀа МагӀалбикан го баь тӀавенача хана», - аьлар экскурсовода Пхьиленаькъан Заретхана.
Цига хиннараша баркал аьлар музея болхлошта, «Бакъдолчун тӀехьа» ганза, цар иштта дика кхетаче дӀаяхьарах.
