Госюрберо оагӏонцара бувзам чӏоагӏбеш ба, «Даьхен лорабой» яхача ганза филиала болхлой
Паччахьалкхен юридически бюроцара бувзам чӏоагӏбара тӏехьа, болх дӏахьош ба ганза болхлой. Из хоам «Сердалога» цу моттигера бир.
«Бартчӏоагӏам беш оттадаьча каьхата кӏалха кулг яздир «Даьхен лорабой» яхача ганза кулгал деча Оздой Муслима, Паччахьалкхен юридически бюрона кулгал деча Бештой ӏийсас. СВО доакъашхошта, цар цӏагӏарча наха гӏо лоаттаде чӏоагӏбеш бувзам ба из.
Тӏемхой дезале нийслуш дола юридически оагӏонцара гӏо эша хӏамаш кхоачашде аттагӏа хургда хӏанз. Цул совгӏа, моллагӏа каьхаташ вӏашагӏтохача, РФ ӏаьдала бокъонга хьежжа, тӏема операце ветерана моттиг чӏоагӏъеш болх дӏахьош хургба уж», - йоах тха газетага бенача хоамо.
«Даьхен гӏулакха арабаьннарашта, цар цӏагӏарча наха, дизза юридически оагӏонцара гӏо лоаттаде йиш хургья вай. Ветеранашта, цар дезалашта дукхагӏа гӏо де аьттув хургба вай, цхьана болх дӏахьош хилча», - аьлар Оздой Муслима.
