ТӀема доакъашхой дезалашта гӀо деш я, «Даьхен Лорбой» яха ганз
29.07.2024 11:36
ТӀема доакъашхошта, цар гаргарча наха могаш дола гӀо деш, цар хьашташ кхоачашдеш, хьабоагӀа «Даьхен Лорбой» яхача ганза моттигерча филиала болхлой. Укх наькъа уж хьожаш хилар тӀема операцен юкъе вахар хаьдача бӀухочун Дошхьакхалой Хьусена дезалга. Цун вахар хадара тешал деш дола каьхат хьаэца гӀо де шийна, аьнна, кхайкар бӀухочун цӀен-нана.
«ОарцагӀбаьннача филиала болхлоша, йоккха юкъ ялалехь, эшаш дола каьхати цун ворхӀ бера да дӀаваларах доагӀаш дола ахчеи хьаэца гӀо дир кхалсага», - йоах тхога кхаьчача хоамо.
Денал, майрал гойташ, Запорожски областе вахар хаьдад вай мехкахочун. Денала орден луш, белгалвир из къаман визза воӀ.
