ГӀалгӀайчера футболист ловзаш хургва, гуржий «Мартвилера мирани» яхача тоабанна юкъе
03.01.2025 14:47
ГӀалгӀайчера Хамхой Хоасбулат ловзаш хургва, гуржегӀарча «Мартвилера мирани» яхача футбольни тоабанна юкъе волаш. Из хоам тха газетага бу футболах йолча ГӀалгӀай республикан федераце. Мартвили яхар шахьар я, мирани – гуржий фаьлгашкара ткъамаш дола говр.
Хамхой Хоасбулата ше дика спортсмен санна дӀавовзийтав хӀанззе а. Хоамо яхачох, из цу тоабанца шин шера ловзаш хургва.
Ювцаш йола клуб гуржий футболах йолча чемпионата юкъе шоллагӀча лиган дикагӀа йолча кхаь тоабанна юкъе хиннай. Кулгалхоша лаьрхӀад, кхы а доккхагӀа толамаш даха дагахьа, команда кердаяккха, дикагӀа бола футболисташ юкъебоалабеш. Дувцачох, кастта цар ловза безаргба хьалхарча лигерча цӀенхашттарча тоабашца.
