Вай мехкахо «Химки-М» яхача футбола тоабанна юкъевахав
27.03.2024 13:16
ГӀалгӀайчера къона футболист «Химки-М» яхача футбола команда юкъевахар, укх деношка цу тоабан кулгалхочунца контракт язъяь хилар бахьан долаш, яхаш, дийцар «Сердало» газетага спортсмена гаргарча наха.
«ХӀанзчул тӀехьагӀа, Оздой Руслан «Химки-М» футбола командагахьа ловза везаш ва. Баьча бартах, еррига ловзара ха йистеяллалца кердача командаца хургва из.
Руслан Ӏомалуш хиннав Москверча «Строгино» яхача футбольни командан академе, шин сезонах ЦСКА кагирхой команде а хиннав. Кагирхой футбольни лиге волаш, цох чемпион хилар 2021/2022 хана юкъа», - аьлар тхоца къамаьл даьчо.
Белгалду, бекарга бетта 7-ча дийнахьа, цига дӀа а ваха, Белгородерча «Салют» футбольни командаца къовсалургва из а (полузащитник) цун новкъостий а.
