Массанахьа шоаш дӀабовзийташ ба вай футболисташ
11.08.2024 15:42
Дикка юкъ яьнначул тӀехьагӀа, толама гӀа баьккхар «Ангушт» яхача футбола клубо.
Астраханерча тоабанца лайза котбаьлар вай кагирхой. Из хоам «Сердалога» бир республикерча спорта гӀулакхех йолча министерствон зарбан болх лелабеча ГӀаппархой Аишас.
«Спорте гӀорваьннача, цӀихеза хиннача Колосов Александра цӀерах йолча стадионе вӀашагӀкхийтар «Ангушта», «Астрахань» яхача тоабан футболисташ. Хьалхара сахьат цхьаккха хувцам боацаш дӀадахадале а, 73 минот яьннача хана, Ӏаьленаькъан Бек-хана чутехача бургацо гӀовттабир берригаш», - йоах тхога кхаьчача хоамо.
Министерствон болхлоша белгалдечох, хьатӀадоагӀача шоатта дийнахьа, Краснодарерча «Кубань-Холдинг» яхача тоабанца вай мехка ловзаш хургба «Ангушта» доакъашхой.
