ГӏалгӀайчен ГАСа бахархой тӏахьех шоай истори лорадара
Телеграм-канале гӀолла Паччахьалкхен архивни гӏулакха болхлоша республикан бахархой тӀахьех шоай истори лорадара, из къаман цхьоагӀо хилар белгал а деш.
«Оаха тӀахьех хӀаравар, дешархочунгара Ӏилманхочунга кхаччалца, вахархочунгара дийшача сагага кхаччалца, шоай историко-культуран тӀехьале, гӀалгӀай къамах дувцаш дола каьхаташ, иштта тешалаш лорадеш леладара. Хӏара сурт, каьхат, моллагӀа дагадоагӀаш дар, дезалера къаьнара мах бараш - из вай республикан йоккхача тӀехьален дакъа да.
ГӏалгӀайчен архиваш хьайийллай хӀаранена, дӀаяхача ханашкара бакъдар ха безам болаш, даьй дагалоаттам лорабе, из тӀехьа тӀайоагӀача тӀехьенга кховдабе безам болчарна. Оаха тӀахьех берригаш цхьана, из гулдара болх дӀабахьара, тахкара, исторен материалаш йоаржаяра. Дӏаяхача ханара лерхӀам чӀоагӀа лард хинна дӏаоттийта ГӏалгӀайчен хургдолчун», - цу дешашца, кхы хӀама тӀатоха дезаш доацача, кхайкарал ду республикан архива болхлоша.
Хала хете а, вай исторе доккхагӀа дола дакъа юхадоагӀаргдоацаш дайнад. Цун бехке вай а да цхьан оагӀорахьа. Вайх дуккханеша терко йоацаш дутт боккхагӀчар дувцар, довза хьажац цу дувцара истори, къаьнара сурташ лорадаьдац. Хӏаьта цу ханара викалаш, цун тешал деш бола, вайна юкъера дӀабахаб. Цудухьа лоархӀаме да вай истори лорадар, хьамсарча мехка мах баь варгвоаца истори вай тӀехьа тӀабоагӀача ноахала дитар.
