ГӏалгӀайчен ГАСо Магасе дӀадихьар «герга истол»
Балан Денна хетадаь ГӏалгӀай Республикан Паччахьалкхен архива болхлоша Магасе дӀадихьар «герга истол», «Исторически дагалоаттама моттиг къаман юхь гойтача даькъе» яхача темах, яхаш, дийцар «Сердало» газетага цигарча зарбан болх лелабераша.
«Кхетаче дӀахьош, Магас шахьара депутатий кхела тайп-тайпарча доакъош тӀара говзанчаш къамаьл деш хилар. ГӏалгӀайчен Паччахьалкхен архива болх вӀашагӀболлача, цох даьр дувцача даькъа кулгалхочо Чиймарзанаькъан Ӏумара ший къамаьл хетадир гӀалгӀай бӀухошта, тӀема хана къахьегаш хиннача турпалхошта, Даьхе лораеча дакъа лоацаш лаьттача.
«ЦаӀ йолча Россе» гӀалгӀай политически парте даькъа кулгалхочун декхараш кхоачашдеча Кхоартой ИбрахӀима дийцар, Даьхен истори лорадара даькъ тӀа партийцаша деш долчох. Магас-Шахьара депутатий кхела кулгалхочо Дарсиганаькъан Хаваж-Бахьаудина терко тӀаяхийтар, кхувш йоагӀача тӀехьенна Даьхенцара безам чубесса хилара», - йоах хоамо.
Кхетаче йистейоалаш, гулбеннараша шоаш кийча хилар гойтар паччахьалкхенна лоархӀамедараш лорадарца бувзабенна болх цхьана дӀабахьа, тӀехьа тӀайоагӀача тӀехьенна лаьрхӀа.
