Хин юхе салаӀа Ӏохувшача наха тӀахьожам лоаттабеш я МЧС ГИМС, МВД
Ахкан ха хьаэттача денз, хин моттигашка рейдаш еш; салоӀаш, лувчаш, чкъаьрий лувцаш болчарца цига лораде дезараш хьалхадоахаш, къамаьл деш ба МЧС, МВД болхлой. Из хоам «Сердалога» бир МЧС ГУ зарбан болх лелабераша.
Къаьстта йоккха терко ю «Лувча йиш яц» яхача моттигашта юстара хилара, бокъо йолча моттигашка мара чкъаьрий ца лувцара.
«Бахархошта хьалхадоах оаха; хин моттигашка лораде дезараш тесса ма дита, фийла хила, яхаш. Хи тӀа арабоалараша деррига хӀама теркалде деза, цхьаккха кхоачамбоацар хила йиш яц цу моттигашка.
Иштта теркалде деза, корта бохабу малар менна чкъаьрий лувцаш вагӀа йиш йоацилга, хӀана аьлча, цу хьале волча сага корта лертӀа болх беш хилац», - белгалдир цу оагӀонцарча балхах волча паччахьалкхен инспектора Темарханаькъан Адама.
