СКФО акушерий Х-ча кхетачен юкъе дакъа лоацаш, хилар вайцигара кхалнаьха лораш
Минеральни Воде дIайихьар Х-гIа акушерий- гинекологий балхацара кхетаче. Цига дийцар акушерий, гинекологий оагIонца хьадаьржача кердадарех, уж юкъелоацаш болх дIабахьарах. Вай мехкара 12 болхло вар, цу юкъе дакъа лоацаш.
Республикерча унахцIенон оагIонцарча министерстве белгалдечох, Москвера, Астраханера, Краснодарера, Ставрополера, Симферополера цу оагIонца къахьегаш бола Iилманхой, болхлой бар кхетаче докладаш ешаш.
Вай мехкара унахцIенон оагIонцара Iилман доктор, профессор йола ГатагIажанаькъан Зарета хилар цига доклад ешаш.
«Таханарча дийнахьа гинекологи эггара дукхагIа нийслуш долча лазарех яр вай мехкахочун доклад. Тахан хьадаьнна кердадараш юкъелоацаш болх дIабахьарах дийцар цо. Кхалнаха юкъе тахан даьржа долча лазарашта духьала цар вахара хьал аттачахьа даргдолча тайпара, физиотерапи, хирурги юкъе йолаш, дарба дIадахьарах цхьацца хIамаш кердадаьхар ГатагIажанаькъан Заретас», - дийцар «Сердалога» министерствон болхлоша.
