МагӀалбика кхален кулгалхо нах тӀаийбеш хилар
МагӀалбика кхален кулгал деш вола Къоастой Ӏаддал-Хьамид бахархой тӀаийбеш хилар, ший балха моттиге. Кхален тайп-тайпарча моттигашкара нах бар хьакимга шоашта къувлараш дувца тӀабаьхкараш. ХӀаьта наьха хаттараш бе-беча оагӀонашца дувзаденна дар. «Ше яхача урам тӀа хий чудилла, яхаш, дехар деш яр цхьа кхалсаг. Цу мугӀарерча болхлошца бувзаме даьнна, техкар оаха из гӀулакх, дукха ца говш аттача доаккхаргдолаш, аз айса тӀахьожам беш.
СоагӀапчарча яхархочо дехар дир, лаьттан доазув шийна тӀехьа дӀачӀоагӀдеш гӀо де, аьнна. Из гӀулакх администраце нийсдеш доацилга дӀахайта, цун мичахьа тӀаяха еза, фу де деза хьалхадаьккхар аз. ТӀабаьхкарашта юкъе бар вахара хьал аттачахьа доаккхаш гӀо эшараш, ахчанца новкъостал дезараш, рамаш тоаде яхаш дехаш хиннараш. Цхьаккха сага дехар ца тохкаш, терко ца еш дусаргдац, аз айса теркам беш, чакхбоаккхаргба царцара болх», - дийцар «Сердалога» Къоастой Ӏаддал-Хьамида.
Белгалде деза, иштта дӀакхухьаш йолча кхетаченаша кхален бахархошта къувлараш, эшараш дикагӀа гучадоахилга. Хьакима аьлар, кхален администраце наӀараш бахархошта массахана йийлла латтилга, моллагӀа хаттар дахьаш бахархой тӀабахка аьттув болга. Цу оагӀонцара болх дӀахохьоргба МагӀалбика кхале.
