Мехкада: «Вай дерригаш - боккха цхьа дезал»
Истореца дувзаденнача доккхача денца даькъалабийцар Мехкадас республикан бахархой - 1992-ча шера ахкан хьалхарча бетта 4-ча дийнахьа, РФ чуйоагIаш, ГIалгIай Республика хьакхоллар чIоагIдир. Из хоам «Сердалога» бир Мехкадаь зарбан болх лелабераша.
«ГIалгIай къаман вахаре, кердача наькъа ниI хьайийллар цу дено. Республика хьаотташ лаьтта хьалхара шераш аттачарех дацар. Экономикан гIулакх геттара халача хьале хиннадале а, боха ца бохаш, барт хилар, денал хилар дIахьокхаш, чакхбаьлар вай къаман нах», - белгалдир ший къамаьла юкъе вай мехкадас Келаматанаькъан Махьмуд-Iаьлас. Цу юкъа къахьегаш республикера вахара хьал, экономикан гIулакх тоадаьд дикка, массайолча оагIорахьа хам бе безаш дика хувцамаш хиннад.
Республикан кулгалхочо хьоахадир; вай къаман нах Даьхе езаш, цун хьал тоадара тIехьа къахьегаш, лакха начIал долаш ба, аьнна. Республика дIайовзийташ, цун сий хьалдоаккхаш хьабоагIарашта доккха баркал кхайкадир цо. ТIатехар, дIахойодача хана иштта хьинаре къахьегаш, мехка сий лорадеш, цун цIи еза лелаеш дIадаха деза вай, аьнна.
«Вай дерригаш - цхьа дезал! Иразе, маьрша, аьттув болаш бахалба вай мехкахой, къаман гIулакх хIара денна тоадеш, дIабаха низ хилба», - белгалдир Мехкадас; къаман юкъе хила безача бартах, бувзамах дувцаш.
