«Вай дерригача къаманна лоархӀаме долча гӀулакхах дувца лов сона! Къаман мотт лерттӀа ховш доаца бераш, хӀара денна дукхагӀа хулаш латт вай мехка. Мотт лорабара тӀехьа хӀанзалца вай мел леладаьраш тоъам болаш доацилга гуш да! Метта хьал тоадергдола, цун гӀулакх лакхача лагӀа тӀа доаккхаргдола болх дӀахьоргболаш, дуккхача шерашка ишколашка наьна мотт хьехаш болча хьехархой, Ӏилма-тохкама иститутера болхлой юкъе болаш, паччахьалкхен комисси вӀашагӀйолла, аьнна, тӀадиллад аз.

Из гӀулакх тоадара тӀехьа цхьацца кердадараш юкъедоаладе деза, аьнна, хет сона. Масала, наьна мотт хьехача къонача хьехархошца, уж кийчбеш, цу даькъера болх дӀабахьар. ГӀалгӀай мотт безаш, лоархӀаш, цӀена из лебеш волча хьехархочун мара аьттув баргбац; наьна мотт берашта боаггӀача боараме безабалийта, Ӏомабайта», - аьлар вай Мехкадас, таханара наьна метта хьал дувцаш.

Мехка кулгалхочо белгалдир, цу хӀаман юхьиг дӀайолалу моттиг бер кхувш дола цӀа долга. Наьна меттацара лоархӀам цӀенъюкъера дӀаболалу эггара хьалха. ГӀалгӀай мотт бувцаш, цун сий лакха лоаттаде дезилга берашта дӀагойташ, царга из цӀена лебайташ хила беза цӀагӀара боккхагӀбараш. Тахан даьша, ноаноша шоай дезалца наьна мотт боаггӀача боараме бувцац, цунга хьежжа да хьаэтта хьал.

«Эрсий мотт цӀена, шаьра ховш хилар; таханарча вахаре наха юкъера бувзам лелабеча лоархӀаме да. Бакъда, наьна метта хьал тӀехьашкатетташ, леладе йиш яц цхьаккха! Ший мотт ховш воаца саг ший къаман визза воӀ, йоӀ хилац! Из кхетаде деза вай тахан, хьалхадаха деза кхувш латтарашта. Къаман мотт-м тӀехьагӀа шаьрбергбар аз, аьнна, юхататта йиш яц гӀалгӀай мотт, хӀана аьлча ший ханнахьа ца Ӏомабаь мотт; тӀехьагӀа цӀена, шаьра лебе могаш хилац», - белгалдир Мехкадас.

ГӀалгӀай мотт кӀоарга, цӀена ховш бола нах, къаьнара наьна мотт бовзараш, тайп-тайпарча балха моттигашкара говзанчаш оарцагӀбаха лерхӀ, наьна метта хьал тоаде дагахьа.