ГӀалгӀайчен Кулгалхочо КИФе дийцар, республике газ чуйилларах
ГӀалгӀайчен Кулгалхочун Келаматанаькъан Махьмуд-Ӏаьлий кхетачене вахача вӀашагӀкхетар хилар «Газпром межрегионгаз» ООО Керттерча кулгалхочунца Густов Сергейца. Цига дийцар ГӀалгӀай Республике гӀолла газ массайолча моттигашка чуйилларах, из кхоачам болаш хилийтарах лаьца дешаш. Из хоам «Сердало» газетага бир Республикан Кулгалхочун зарбан болх лелабераша.
«Дийца дош дар газах боагӀаш бола мах дӀабалар, тарифаш, газ чуйиллара программа, газ дӀатӀахьош долча даькъе наха гӀо дарах.
ГӀалгӀайчен газ чуйиллара даькъ тӀара болх 2021-2025 шерашка дегӀабоалабара программа лаьрхӀа я, из дукхагӀа нахага дӀакхоачаргйолаш, кердача объекташка газ чуюлларгйолаш, цу юкъе ЖӀайрахьарча туристически даькъ тӀа, иштта шахьарашка, юрташка дӀа ца кхаьчача из хилийтар», - аьлар ГӀалгӀай Республикан кулгалхочо Келаматанаькъан Махьмуд-Ӏаьлас.
Цо белгалдир иштта, ГӀалгӀайчен бахархошта газ дӀахоттара, эшача из чуйиллара Ӏаьдало ахча луш хилар 100 000 сом, из лаьрхӀа да газаца бувзабенна гӀирс эцара, балхаш дӀадахьара.
