ГӀалгӀайчен Кулгалхочо мехкдаьттахошца дийцар регионе из болх дегӀабоалабарах
ГӀалгӀайчен Кулгалхочо Келматанаькъан Махьмуд-Ӏаьла кхетаче хилар «ЦГК Холдинг» ООО керттерча кулгалхочунца Камышев Дмитреца, цун гӀончаца Ершов Николайца, иштта «РН «Ингушнефть»ОАО исполнительни кулгалхочунца Балайнаькъан Ӏумараца. Кхетаче дӀахьош дийцар регионе из боахам дегӀабоалабарах.
«Керттера декхар- мехкадаьтта дукхагӀа хилийтар, цу юкъе экологен хьал а дӀалархӀар», - аьлар региона кулгалхочо.
Къаьмаьл дӀахьош дийцар хьалхле лелаю технологеш юкъе яхарах, болх дикагӀа вӀашагӀболларах, из таьрахьашка баккхарах, къаьстта бола болхлой цу даькъ тӀа кийчбарах.
«Цхьана а, балха даькъ тӀа Ӏаьдалца дагадоалаш а хуле, вай таро хургья дика толамаш даха», - аьлар ГӀалгӀайчен Кулгалхочо.
Мехкадаьтта даккхара балха даькъ тӀа вай дегӀадоагӀаш хиларца мара, хургьяц керда балха моттигаш, республикан бюджете хьачуйоагӀаш йола йоал дукхагӀа хилийта, цунца цхьана кхоачашде йиш хургья лоархӀаме дола социальни хаттараш а.
Шинна а оагӀоно шоайла барт бир кастлуш уж белгалдаьха хаттараш кхоачашде болабалара. ГӀалгӀайчен Кулгалхочо чӀоагӀдир, республика цу боахама эшаш дола новкъостал лоаттаде кийча хилар.
