«Укх бетта 23-ча денгара хьатӀабоагӀача бетта 21-ча денга кхаччалца, дӀахьоргба цаӀ йолча паччахьалкхен экзамена болх. Экзаменаш дӀалуш хиннача ворхӀ моттиге, цӀагӀара моттиг йолаш, 1000 совгӀа долча бераша химех, географех, литературах йола экзаменаш дика дӀаелар. Цар вахаре лоархӀаме долча дийнахьа, цар оагӀув хьаллоацаш, гӀо деш хила деза вай, деррига боаггӀача боараме дӀахьош», – белгалдир вай Мехкадас, цу оагӀон балхах дувцаш.

Мехка кулгалхочо хьоахадир, экзаменаш шозлагӀа юхаяла езарашта укх шера уж дӀаяла аьттув бала беза вай, аьнна. Цо теркалдечох, цу балха юкъедоаладаьча кердадараша дӀадахьа дезача беса чакхдоалийт из гӀулакх. Аьттонца дӀачакхбала, лийрхӀар кхоачашдеш дӀабаха даькъалабийцар вай Мехкадас дешархой. Тахан, цу экзаменашта кийчо еш, хьегаш дола къа, дӀахьош бола боккха болх – из вай кхоане я.