Кагирхой Денца даькъалайийцар Мехкадас республикера къона тӀехье
Халкъашта юкъерча кагирхой Денца мехкара къона тӀехье даькъала ювцаш къамаьл дир вай мехкадас Келаматанаькъан Махьмуд-Ӏаьлас. Мехка кулгалхочо белгалдир, мехкара кагирхой шоай хӀама тоадара, доаржадара тӀехьа къахьегаш болга. Таханарча дийнахьа мехка 217 эзар совгӀа кагирхой ба. Лакха начӀал, говзал йолаш, къаман вахаре пайдане хургдараш хьаллаца шоаш кийча болга хьагойташ ба уж.
«Шо - вай республикан таханара вахар, кхоане я. Къаьстта шоана тӀалатт, шул хьалхагӀа лаьттараша хьаденар лорадеш, доаккхал деш дӀадахьара декхар, къаман вахаре сийрда, беркате наькъаш хьаделлара тӀехьалаттар. Тахан гуш да спорте, Ӏилман, культуран, дешара, бизнеса оагӀонашка оаш къахьегилга, цхьацца проекташ йоаржаеш, боккха болх дӀахьолга. Ерригача Россе моттигашта, халкъашта юкъе вай юхь хозача, беркатеча оагӀорахьа дӀагойта езараш шо да», - аьлар вай мехкадас Келаматанаькъан Махьмуд-Ӏаьлас, ший къамаьла юкъе.
Цо теркалдир, гӀалгӀай мехкара къона тӀехье коталон наькъашка кхача ловш, къахьега, хӀама довза гӀерташ йолга, хӀаьта мехкарча кулгалхоша цар лерхӀамаш хьаллоацаш, могаш дола гӀо лоаттадергда.
