Ший балха тӀа юхахержа Чайка Юрий даькъалавийцар вай Мехкадас
Россе СКФО Президента массазара викала гӀулакха тӀа хьожаваь Чайка Юрий, цу боккхача балхаца даькъала вувцаш, къамаьл дир вай Мехкадас Келаматанаькъан Махьмуд-Ӏаьлас. Из хоам «Сердало» газетага бир мехка кулгалхочун зарбан болх лелабераша.
«Ший балха тӀехьа лакха говзал йолаш, бехктокхаме, боаггӀача боараме из дӀахьош хьавоагӀарех ва из.
Къилбаседа Кавказа хьал дикача оагӀорахьа тоаделар, цо шийна хьалхашкара декхараш дизза кхоачашдарах да, ала йиш я», - белгалдир вай Мехкадас Келаматанаькъан Махьмуд-Ӏаьлас.
Республикан кулгалхочо теркалдир, Чайка Юрий вай мехка федеральни оагӀонца массахана новкъостал лоаттадеш хьавоагӀилга. Белгалдоаккх, СКФО болхлоша мехка кабминаца даиман бувзам лелабеш хиларо республикера дукха керттердараш кхоачашде таро луш хилар.
Аьттонца, паччахьалкхено дӀадеххача тайпара ший болх дӀабахьа, доккхача дикашка кхоачаш къахьега даькъалавийцар вай Мехкадас Чайка Юрий.
