ГӏалгӀайчен Кулгалхочо даькъалабийцар Илдарха-ГӀалан бахархой, шахьара 30 шу дизарца
Илдарха-ГӀала ший 30 шу дизара цӀай дездеш я. Цу цӀайца уж даькъалабийцар ГӏалгӀайчен кулгалхочо Келаматанаькъан Махьмуд-Ӏаьлас, цо белгалдир из моттиг къаьстта мехка лоархӀаме хилар. Илдарха-Гӏала керттерча хӀама кхоллара наькъ тӀа дӏоагӏа хинна дӀаэттай, цунна чуйоагӀаш я эггара лоархӀамегӀа йола предприятеш. Хӏара шера цу доал дара даькъ тӀа дика хьалаш хьакхоллара деш латташ дукха дика балхаш да. Илдарха-Гӏалан юкъара доазонаш хувцалуш доагӀа, уж дикагӀа хулаш, бахархошта лерттӀа хьалаш хилара накъадоалаш да, иштта дика дегӀайоагӀаш я шахьара транспорта оагӀув а.
«Бакъда эггара мах болаш ба Илдарха-Гӏалан бахархой; къахьегама тӀера болаш, шоай шахьар езаш, хьаьша-да тӀаэцара кийча болаш хьабоагӀаш хиларца. Шо бахьан долаш Илдарха-Гӏало юкъедахь социально-экономически, культуран вахара доккха дакъа.
Къаьстта баркал ала безам ба са боккхагӏчарна, ветеранашта, из шахьар хьакхоллаш цун кертте лаьттарашта. Цар къахьегам, уж шоай гӀулакха мутӀахьа хилар бахьан долаш хьахилар из кӀийле. Дег чура даькъалабувц аз Илдарха-Гӏалан бахархой укх денца. Могаш, маьрша хилда шо а, шун тӀехье а. Шун шахьар дӀахо а дегӀайоагӀаш хийла», - аьлар Келаматанаькъан Махьмуд-Ӏаьлас.
Илдарха-Гӏалан бахархоша, раьза болаш, тӀаийцар шоашта мехка Кулгалхочо баьккха ловца. Шоаш дӀахо а, иштта дика шоай хьамсара шахьар, еррига республика дегӀайоалаяра тӀехьа къахьегаш хургболга белгалдир цар. Республикан кулгалхоша хьал а лоацаш, Илдарха-Гӏала дӀахо а дегӀайоагӀаш хургья, ГӏалгӀайчен вахара-экономически лоархӀаме юкъ а йолаш.
