Донецкера, Луганскера, Запорожьера, Херсонера бахархой маьрша баха даькъалабийцар Мехкадас
Россех хьакхетара Денца, даькъалабийцар вай Мехкадас Донецки, Лугански республикай, Запорожски, Херсонски областашкара бахархой. Из хоам «Сердалога» бир Мехкадаь зарбан болх лелабераша.
«Вай Даьхенца - Россеца иразе, маьрша бахалба уж! Уж Россех хьакхетара Ди дездеш да вай тахан. Цу моттигашкарча бахархошта лерхӀаме, доккха ди да из! Шоай Ӏадаташ леладе, истори, культура лархӀа, шоай мотт бувцаш баха йиш йолаш, паргӀато кхаьчай цу нахага», - белгалдир вай Мехкадас.
Иштта республикан кулгалхочо теркалдир, цу наха дукха халонаш текхалга, хӀаьта тахан, Россеца сийрда кхоане хьалъеш, керда хувцамаш юкъедоаладеш баха аьттув ба цар. Вай мехко царна гӀо лоаттадергда массахана.
Вай республико новкъостал лоаттаду тахан Токмакски кхаленна. Еха моттигаш тоаеш, эшаш бола кхоачам Ӏокхухьийташ, могар ду царна.
ТӀема операце хьалхарча дийнахьа денз, цига дакъа лоацаш ба къаман сийдола къонгаш. Майралца, деналца Донецк, Луганск лораеш; Даьхен гӀулакха латт гӀалгӀай яхь йола бӀухой, эпсараш.
