Керда ФОКаш хьаелларах, дийцар Мехкадас
Мехкадаьца дIайихьача «Гуччахьара къамаьл» яхача кхетаче, геттара дукха хаттараш эттар спорта оагIонца дувзаденна.
Шолжа-Шахьаре вахача Гайсанаькъан Аслана мехкадаьга дехар дир, Энгельса цIерагIча ураме ФОК хьалъяйта шоашта, аьнна.
Минспорта кулгал деча Белхарой Руслана белгалдир, цу ураме ФОК хьалъе цхьаккха тайпара йиш йолаш дац, доазонца дувзаденнача цхьацца бахьанашта тIагIолла.
Шахьара да волча Iумаранаькъан Аслана яхачох, Шолжа-Шахьаре йиъ спорта моттиг я. Цул совгIа, 2023-ча шера болх бе йолаеннай ФОК, ца говш хьаелла лерхIаш цхьаькха моттиг а я. МагIалбика кхален вахархо волча Кийнаькъан Адамгара а кхаьчар иштта хаттар.
Йоккхача, Юкъерча, Ачалкхенашкара, Дабе-Юртара бахархой духхьал цхьан ФОКе болх дIакхухьаш ба, яхаш, дийцар цо.
Цу оагIонцара къахьегамхой оарцагIбаьха из гIулакх дикка тохкаргда, аьнна, соцам бир Мехкадас.
