«ХӀара шера со вода сай хьехархо Горбанева Мухьмада Нелли йолча, сона немций мотт Ӏомабаь я из. Сога хаьттача, хьехархочун Ди ший хьехархошца, хьехамчашца дӀадахьа деза, вай когаш тӀа оттадеш доккха дакъа юкъеденарашца. Аз баркал оал Мухьмада Неллена цун профессех, сатемах, дешача шерашка цо сайна лоаттаяьча терконах. Профессен цӀай дездеча хана, хулаш долча тхоай вӀашагӀкхетарах аз массаза доаккхал ду. ХӀара шера дагаух тхона, чаь пела молаш дагӀаш, дӀаяхача ханашка хиннар, из дика Ӏадат хинна дӀаэттад»,-аьлар мехка кулгалхочо. Ишкола хьехамчаша доккха дакъа дӀалоац хӀара сага вахаре, йоах Махьмуд-Ӏаьлас. Цар нийсача вахара уйла е Ӏомаву, дика гӀулакхаш хьех, дегӀавара а иштта начӀал дегӀадоаладара а новкъостал ду, хьалхашка нийслуш йола халонаш юстаръяха Ӏомаву.