«Дикала доазув» яхача ганза кулгалхочунца кхетаче йир Мехкадас
«Дикала доазув» яхача ганза хьалха латтача Ткаченко Александраца, хала лоархӀаш долча лазараша лаьцача берашта гӀо дарах дийцар вай Мехкадас Келаматанаькъан Махьмуд-Ӏаьлас. Иштта цар дийцар республикерча берий поликлинике цу тайпарча лазарашта дарба де хьайийллача моттига балхах.
Ткаченко Александра белгалдир, Россе моттигашта юкъе вай республиканна цӀокаца хулача генетически лоархӀача лазара дарба деш йола вай заман аппарат енна хилар. Боккха лоархӀам болаш да къаьстта цу тайпара моттиг вай мехка хьаеллар.
«Халача лазарах бер цамогаш хилар, йоккха хало я берригача дезала. Массахана дарба, тӀахьожам эшаш да уж тайпара бераш. Сабаре, сатохаш хиларал совгӀа, дукха рузкъа эшаш хӀама да из», - белгалдир вай Мехкадас.
Укх тӀехьарча диъ шера цу ганзо могаш доацача берашта хьахьожадаь ахча 1 млрд совгӀа да.
