Илдарха-Гӏалий тӏарча мах беча моттигий дош дувцаш, тохкаш ба болхлой
Шахьарерча мах беча моттигий йоалацара болх мишта латт тахка, гӏулакх дӏадахьар хила деззача тайпара дий хьажа арабаьлар тахан цу оагӏонцара къахьегамхой. Осканаькъан, Джабагӏанаькъан цӏерах долча урамашка болх дӏахьош йолча коммерчески моттигашка хьожаш хилар уж укх наькъа.
«Сердалога» Илдарха-Гӏалий тӏарча администрацера бенача хоамах, бизнеса болх хила боаггӏача боараме, лоархӏамедараш лорадеш дӏахьош бий техкар цу гӏулакха арабаьннараша. Цу юкъе дар болх паччахьалкхен оагӏонцара чӏоагӏо йолаш, болх беш барий къахьегамах йола бокъонаш лораеш хилар, иштта кассови гӏирсий гӏулакх, ахча дӏадалара болх малагӏча оагӏонца чакхбоаккхаш ба техкар цар.
Цхьацца кхоачамбоацараш гучадаьлар цига. Гӏалатбаьннараш ӏаьдала бокъонга хьежжа бехктокхаме озаргболаш каьхаташ кийчдир тӏахьожаш хиннараша. Бизнес лелаерашца къамаьл деш; лоархӏамедараш, боаггӏача боараме лораде дезараш белгалдир.
Мах бара гӏулакх, йоалаца дувзаденнараш лертӏа теркалдеш, дӏадахьа дезилга хьалхадаьккхар тикашта доал дерашта.
