Моттигерча Юкъарлон палатан балха лакха мах оттабир вай Мехкадас
Юкъарлон палата тахан дӏахьош латта болх берригача мехка лоархӏаме болга, белгалдир Мехкадас. Из хоам «Сердалога» бир мехка кулгалхочун зарбан болх лелабераша.
«2025-ча шера Юкъарлон палата дӏабихьар боккха, лоархӏаме болх ба. СВО доакъашхой хьаллоацаш, кагирхошца Даьхенцара безам чӏоагӏбарах йола кхетаченаш дӏакхухьаш, иштта унахцӏенон оагӏонца, экологеца дувзаденнараш юкъелоацаш, къахьийгад цу оагӏоно. Къаьстта лоархӏаме дакъа дӏалаьцарех я цу балха юкъе Юкъарлон палата хьалха латта ӏамарханаькъан Лейла.
Цо кулгал деш, массайолча моттигашца бувзаме болаш, шоай декхараш биззача боараме дӏахьош ба тахан уж нах. Бахархошта къувларашта, эшарашта ханнахьа терко е аьттув боалл, из бахьан долаш. Со каст-каста вода Юкъарлон палате, сон а гу, цу наха шоай болх бехктокхаме дӏахьолга, хӏара денна из тоабе гӏерташ цар къахьегилга. Дӏахойодача хана а иштта мехка пайда беш дӏахьоргда аьнна хет сона цар шоай гӏулакх», - белгалдир мехкадас Келаматнаькъан Махьмуд-ӏаьлас.
Дӏадахача шера СВО доакъашхошта гӏо деш, кагирхошца кхетачеш еш, наьна а бера а бокъонаш лораеш; культураца, экологеца, унахцӏенон оагӏонца дувзаденнараш хьаллоацаш, боккха болх ба цар чакхбаьккхар. Къаьстта белгалбаьлар уж РФ Президента Путин Владимира кхайкадаьча Даьхен лорабой Шера хетаяь кхетаченаш дӏакхухьаш. Республиканна юкъера кхетаченаш, автопробегаш, денала урокаш, дагалоаттама боламаш, тӏема шерашка Кавказерча Магӏалбике лаьттача тӏема хетаяь моттигаш кийчъеш.
Иштта кӏезига дац терроризм, экстремизм яхача зулама, наркоманена духьала, ЖКХ, унахцӏенон оагӏонцара бахархой бокъонаш лораеш даьр. Геттара йоккха терко лоаттайир Юкъарлон палато наьна, бера бокъонаш лораяра, иштта вахара оагӏонцара новкъостал лоаттадара, дегӏа могашал эшаеннача наха новкъостал дара тӏехьа.
Тайп-тайпара кхетаченаш дӏахьош, СВО доакъашхошта, цар дезалашта, берашта, таро хала ярашта терко еш хилар Юкъарлон палата. Вай мехка лоархӏаме бола из боккха, мах баь варгвоаца болх укх шера а иштта тӏатеӏӏа дӏахохьоргба.
