Мехкадас лакха мах оттабир Алхасте хьалъеш латтача спорта майданна
ГӀалгӀайчен кулгалхочо Келаматанаькъан Махьмуд-Ӏаьлас лакха мах оттабир Алхасте хьалъеш йолча спорта майданна. ГӀалгӀай юрта АьдагIий мехко деш дола совгӀат да из, яхаш, дийцар «Сердало» газетага республикан кулгалхочун зарбан болх лелабераша.
«Со хилар Алхасте хьалъеш йолча спортивни майданга хьажа ваха. Из хургья йийлла спортивни гIишло, цига ловза йиш я волейболах, баскетболах, воркаутах. Балхаш йистедаьннад: турникаш оттаяьй, тIагIолла лела хенаш, шведски лоамеш, эшаш дола кхы гIирсаш Iалашдаьд. Кастлуш, лаьрххӀа хьаелларгья из.
Баркал ала лов сона АьдагIий мехка кулгалхочунна Кумпилов Мурата, из дика совгӀат цо вайна дарах!» - аьлар Махьмуд-Ӏаьлас.
Дукха ха яр цу юрта спортивни хьалаш доаца. ХӀанзчул тӀехьагӀа боккхабараш а зӀамагӀбараш а гӀадбугаргба цу дешо. Шеко йоацаш, из моттиг наьха могашал тоаяра дика накъайоалаш хургья.
