Мехка Кулгалхочо республикан бахархошка кхайкарал дир, къам мехкахдаьккха 79 дизарца
Глава Ингушетии Махмуд-Али Калиматов отметил, что единство и сплоченность ингушского народа помогли преодолеть все трудности депортации в Среднюю Азию и Казахстан.
«Хьамсара мехкахой! Тахан 79 шу дуз вай къам Юкъерча Азе, Казахстане Iодахьийта, укх балан дагалоацама деношка, аз дег чура хьаллоац цу халача ханашка шоай гаргара нах, кхоаччара нах байна биса хIара дезал, дукхача халонех чакхбаьннараш.
Мехкахдаккхар зIамигача гIалгIай къаманна чIоагIа Iаткъар, йоккхий халонаш, нийсхонца доаца вахар ла дийзар. ХIара гIалгIай дезале цу ханара халонаш дег чу йисай, уж дагаехача, тахан а оагаву, тIакхаьча хинна халонаш селлара унзара хиларах. Мел дукха шераш дIаахарах, гIалгIашта дагадоагIаш хургда из, шоай дезала а цар дезала а цох дувцаргда.
ГIалгIай къаман исторе хьагойт, мел чIоагIа унзара вахар из хиннад, бакъда барт болаш, шоайла тIаотташ, морзо йолаш хиларах, къам доханзар.
Шоай хьамсарча цIенах, мехках баьнна, кхыча, ца бовзача наьха мехка нийсбаларах, моцал, шелал ла езарах, беха боацаш, вай лоаман дикагIйола оамалаш гойташ, духьалъэттар вай къоаной, вай къам. Уж беха хьовзанзар, е царна эгIазло чуйоссанзар, хIара денна духьалйоахаш хиннача халонаша кIалбитанзар уж, дукхагIа шоайла кхотабелар, барт чIоагIбелар. Шоай цIи ца йожаеш, тIехьено доаккхал дергдолча наькъ тIа баьлар.
ГIалгIай массаза а хиннаб, вахарах доаккхал деш, шоай дезал кхебеш, шоай мохк лорабеш. Мехкахдаьккхача вай къамо дIадихьача шераша хьагойтар, уж мел барт болаш, цхьоагIо йолаш, дин лорадеш, къаман Iадаташ леладеш, къоаной зIамагIчар лоархIаш, боккхагIчарга ладувгIаш хьабоагIаш ба. Цига яьккхача хана, зIамагIбараша дешар, уж харцахьарча наькъ тIа ца боалаш, нийсача новкъа болаш хьалкхувш хилар тийша дар вай хьаькъалерча къоаноех. Цигара юха шоай мехкабаьнначул тIехьагIа, цар шоай хьаькъалца, дешарца таханарча ГIалгIайчен лард еллар.
Тахан барт болаш, машар болаш, дукхача къамий Россе цхьоагIо йолаш вай дахача хана, вай декхар да, исторе балан оагIонаш йиц ца яр. ГIалгIай къаман эггара лоархIам болаш да, вай тахане хьалкхеяьча къаман къонгий, мехкарий цIераш йиц ца яр.
Вай декхар да, вIалла кIаьд ца луш, дешар, мохк а республика а дегIайоалаяр. Из декхар кхоачашдарца, Казахстана, Юкъерча Азе лаьтташка бисача даьшта дагалаьттар кхоачашду вай.
Вайна цIаккха дицлургдац уж хала шераш, иштта бицлургбац цига байнараш. Кодам бувц цар гаргарча нахага. Дала гешт долда, Дала къахетам болба байнарех. Дала воча хIамах лорадолда вай къам.
Массане а аьттув балба, машар хилба», — аьлар, ший кхайкаралца Келаматанаькъан Махьмуд-Iаьлас.
