ГӀишлошъяра Министерствон кулгалхо хьежар Магасе хьалъеча ишколага
ГӀалгӀайчен гӀишлошъяра Министерствон кулгалхо Иленаькъан М. хьежар, Магасе 704 моттига лаьрхӀа хьалъеча ишкола болх мичахьа кхаьчаб. Ше цига волаш, цун къамаьл хилар гӀишлонхой тоабаца, балха дикалга хьежар, цхьадола хаттараш делар, яхаш, дийцар «Сердало» газетага моттигерча гӀишлошъяра Министерствон зарбан болх лелабераша.
«Боахама кулгалхо раьза хилар цига баьча балха дикала. Цо белгалдир дукха хувцамаш хилар, тховнаш хьалтехад, сантехника дӀаоттаяьй, мебель гулъеш латт. Кастлуш гӀишлонхой дӀаболалургба деррига доазув цӀенде.
Болх беча фирман викало аьлар, шин кӀира гӀишло йистейоаккхаргья. Цу юкъа гӀишлон тӀера балхаш де деза, спортивни а ловзарий а майдаш кийчъе еза», - аьлар тхоца къамаьл даьчо.
Белгалду, дӀадахача шера ГӀалгӀайченна 195 миллион сом ахча делар из ишкол йистеяккхара. Керда ишкол хьалъяро таро хулийтаргья республикан дешара моттигаш алсамъяха.
