ГӀалгӀайчен сага бокъонаш лораер дакъа лоацаш ва Ерригроссийски кхетаче
ГӀалгӀайчен сага бокъонаш лораеш вола викал дакъа лоацаш ва, бокъонаш лораяра викалий Ерригроссийски кхетаче, из дӀахьош я тахан Селашкахьа. Федеральни омбудсмена Москалькова Татьянас кулгал а деш, дӀахьош йола кхетаче хетаяь я, гаьнарча юрташка бахача наьха бокъонаш лораяра, яхаш, дийцар «Сердало» газетага, мехкарча хоамий-аналитически даькъ тӀа.
«Цу кхетаче ЦӀечой ИбрахӀима къамаьл дергда «Гаьнарча моттигашка бахача наьха деша бокъо хилар» яхача темах. Ше къамаьл деш, сага бокъонаш лораяра викала хьоахадергда, дика дешар Iалашдарца, иштта гаьнарча моттигашка болх беш болча хьехархошта новкъостал дара йола программа кхоачашъярца дувзаденна дешаш. Цу тайпара шоай болх дӀабихьачул тӀехьагӀа, цига дакъа лаьцараша, федеральни закона органашта, исполнительни Ӏаьдала, Российски Федераце субъектий кулгалхошта, Российски Федераце Президента федеральни кураш тIарча викалашта лаьрхӀа, гаьнарча моттигашка бахача наьха бокъонаш лораяра дола хьехамаш кийчдергда», - аьлар тхога хоам баьчо.
Селашкахьа дӀахьош йола российски омбудсмений форум болх беш хургья шин дийнахьа. Цига дакъа лоацаш ба Ӏаьдала федеральни моттигашка болх беш бола нах, Паччахьалкхен Думан депутаташ, дешара, унахцӀенон, иштта вахарерча новкъостала, къахьегама Министерствай кулгалхой гӀончаш.
