Сага бокъонех волча викала гадаьккхар дукхача берий наьна
Сага бокъонех вола викал волча латкъа ера кхаь бера нана, ӏаьдалгара хӏара бетта хьадоагӏаш дола ахча ший берашта хьаахийтац, аьнна. Йиш ехача кхалсага дийцачох, укх шерарча бекарга бетта денз чутелаш дола каьхаташ цхьацца кхоачамбоацараш юкъедолаш да яхаш кхестаю из. Теркалде деза, хьалхагӏа ахча хьаийдеча хана цо чутийнна каьхаташ иштта оттадаь хиннилга.
«Сага бокъонех вола викал оарцагӏваьлар дог деха кхестача кхалсага гӏулакх тахка. Россе Вахара ганзага гӏолла болх дӏабихьар цар. Хьийга къа довнзар, Даьла къахетамца, соцадаь латта ахча хьадоладалийта деза, аьнна, соцам бир цу оагӏонцарча болхлоша. Хӏара бетта 18 шерга кхачанза долча ший берашта 16 169 эзар сом ахча хьаийдергда цо», - дийцар «Сердалога» УПЧ. Ахча хьадоладалийтарал совгӏа, из соцадаь мел лаьттача бетташка доагӏаш хиннар а хьалургда цунна.
