ГӏалгӀайчен паччахьалкхен драматически театро кагирхошта цIай дир
Шолжа-Шахьара культуран ЦӏагӀа, хьажархошта яйра Авксенти Цагарели «Ханума» яха цӀи хеза пьеса, гӀалгӀай меттала яьккха. Спектакла режиссёр ва ГӏалгӀайчен халкъа артист Галай Мурад, цу юкъе ший дуккхача шерашкара балха говзал енай цо. Паччахьалкхен драматически Боазаркъанаькъан Идриса цӀерагӀча ГӏалгӀайчен театра керттера хьажархой хилар Шолжа-Шахьара дешара моттигашка, колледжашка багIараш. Царех дукхагӀчарна хьалхара гуш яр профессиональни театра спектакль, цо из моттиг культуран боккха лоархIам бола хIама даь дIаоттайир.
«Цунга хьажа йиш яр федеральни программанна чудоагӀача «Пушкински картах», иштта Ерригроссийки культуран-дешара «Культура - дешархочунна» проектах. ГӏалгӀай меттала из хиларах, таро яр ма дарра цигара хьал довза, дегах гӀолла чакхдаккха, хӀаьта режиссёра болх геттара белгалбеш дар сага мах бараш, уж цу пьеса юкъедахийтад», - аьлар «Сердало» газетага ГӏалгӀайчен Паччахьалкхен драматически театре.
Хьажа баьхкараш чӀоагӀа раьза болаш бисар. Студенташ, дешархой терконца хьожаш бар дӀахо хургдолчунга, турпалхошца цхьана саготдеш, нийслуш хиннача вахара моттигашка. Спектакль яьнначул тӀехьагӀа, артисташ дукха лоаттабир тӀоараш детташ зале, дIа ца бохийташ, дуккхабараш сцена тӀа баьлар, актёрашта баркал ала, цар боккъонцахьа дола театра цӀай шоашта оттадарах.
Цу тайпара, «Пушкински карта» программага гIолла, иштта «Культура - дешархошта» яхача проектага гIолла таро лу царна дунен классика йовза; цул совгӀа, из ший наьна меттала яккхар го, из лоархӀаме да къаман культура дегӀайоалаеча.
