ГIалгIайчен паччахьалкхен ИЗО музей кийчо еш я «Искусствон бийсанга»
ГIалгIайчен исбахьален искусствай музей дакъа лоацаш хургья Ерригроссийски «Искусствай бийса- 2025» яхача боламе, из вай мехка дIахьоргба халкъа цхьоагIон Ди долаш «Культуран цхьоагIо-къамий низ» яха лостам болаш. Музея болхлоша тайп-тайпарча кепара программа дIахьу, хIара хьаьшан шийна дезаш дола гIулакх харжа йиш хургйолаш, иштта дIаяхача ханашцара, Iадаташцара бувзам хургболаш.
«Искусствай бийсанна» чудоагIаш, хьажархой таро хургья гойтама проекташ го, иштта боккхийчар дакъа лоацаргда говзанча хьехамашка, хIаьта берашта исбахьален болх гойтаргба, таханарча заман технологеш Iомаяр юкъе а доаккхаш. Иштта цига хургда халхараш, кхоллама тоабаша гойтаргья шоаш цу цIайна яь кийчо. Экскурси дIахьочар дувцаргда, Россе къамаш вIашагIтохаш долча культуран бувзамех», - аьлар «Сердало» газетага паччахьалкхен ИЗО музее.
«Искусствай бийса» - из я искусствай дуне довзара йола, тайп-тайпара культураш шоайла вIаший бувзам лелабеш хилар гойташ йола, керда кхоллама таронаш хьаеллаш, халкъа цхьоагIо, дукха исбахьален тIехьале хилар гойташ йола моттиг.
