Фермерашта шоай болх дӀабахьа доккха гӀо ду паччахьалкхен ахчаша
Мехка кулгалхоша ахчаш теларца, доккха гӀо ду фермерашта, кооперативашта шоай болх дӀабахьа. Из хоам «Сердалога» бир Мехкадаь зарбан болх лелабераша.
«2024-ча шера 171 млн совгӀа долча ахча хьаийцар вайцигарча 65 фермерий боахамо, 3 кооперативо.
Царна юкъерча 53 КФХ «Агростартап» яха ахчаш ийцад боахам хьакхолла, боаржабе. Луш дола эггара дукхагӀа дола ахча - 6 млн сом», - белгалдир мехкадас Келаматанаькъан Махьмуд-Ӏаьлас, юртбоахаме къахьегарашта лоаттадеча новкъосталах дувцаш.
Иштта белгалду, вай фермерий боахамашта лаьрхӀа, дезала фермаш йоаржае «Агропрогресс» яха ахчаш деннилга. 30 млн совгӀа ахча да цу беркатеча гӀулакха хьакъоастадаьр.
Цул совгӀа, шоай болх дикка тоабе аьнна, 70 млн сомах латта ахчаш деннад кхаь кооператива.
Мехкадас белгалдир; иштта даьча новкъостало юртбоахаме къахьегарий хьал дикка тоадергда, аьнна.
