«ГӀалгӀайче вай массане Даьхе я, йоккхий проекташ йоаржае нигат долаш кхаьчав из вайцига. Бахархой вахара хьал тоадара тӀехьа кхелла я уж ерригаш. Укх шин шера вай мехка дӀахьош латтача проекташта 4 млрд рузкъа дӀатӀадахийтад Гуцаранаькъан Микаила», - белгалдир Мехкадас, цо мехка деча доккхача гӀулакхех дувцаш. Цун хьалхаленца доаржадеш латтача дикашта юкъе я, лоархӀаме моттиг дӀалоацаш, Эбарга-Юртара дегӀа могашал эшаеннача берий интернат, «Аьрзи» яха лоамера берий салоӀа лагерь.

Уж шаккхе гӀишло тоае езача хьале кхаьча, харцар кхерам болаш латта дикка ха яр. ХӀаьта тахан, йовзаргйоацаш, тоадаьд цар куц. 450 млн сом ахча дӀатӀадахийтад уж тоаеш. Иштта тоадеш латт вай мехкара кашамий доазош, лоамара гӀалаш.

«Тахан вай массане доаккхал де дезаш, баркал ала дезаш гӀулакхаш да уж! Воашта деш долча хӀаман хам бе Ӏама деза вай, бух боаца, харцахьара, наха юкъера гӀулакх корзагӀдоаккхаш дола во хабараш ца доаржадеш. Дер дайнараша арадоахача ши кепиг мах боацача къамаьлаша пайда бац, зе мара.

Бахархошка кхайкаду аз, Гуцаранаькъан Микаилаца оахош вӀашагӀ мел деллар дӀачакхдоаккхаргда оаха, Даьла низаца. ДӀайолаяьча массайолча гӀишлошка тӀатеӀӀа болх дӀахьош латт. Цхьаццачар гӀулакх каьхаташ кийчдеча, иштта кхыдараш кхоачашдеча кхаьчад. ЖӀайрахьа кхалерча 123 гӀалан ПСД кийча да», - белгалдир вай Мехкадас.

Цо хьоахадир, вай мохк таханарча дийнахьа доккхий дикаш кхоачашдеча наькъ тӀа болга, хӀаьта цу дерригнена хьалхалаттар Гуцаранаькъан Микаил волга.

Мехкадас иштта дийцар, уж деррига гӀулакхаш вай бӀарччача къаман, мехка хьал тоадара тӀехьа дӀадоладаьлга, цунга хьежжа, хам беш хила беза бахархой шоашта гонахьарча дикай. Вай мохк хӀара денна тоалуш, хозлуш латташ го ловш волча Гуцаранаькъан Микаила, доккха баркал ала дезарех да вай!