ИнгГУ, «Шолж» ахархоша барт бир бувзамаш леладе
ГӀалгӀайчен керттерча вуза, «Шолж» яхача агрокомплексо шоайла бувзамаш леладе барт бир. Цунна чудоагӀаш да, ГӀалгӀай паччахьалкхен университета студенташ, иштта цу даькъ тӀа дешар дийша баьннараш предприяте балха оттабара хьакъехьа. Кулгаш яздарал хьалха, агрокомплекса викалий кхетаче хилар агроинженерни, юридически, химико-биологически, исторен факультетий, иштта экономика, кулгалдара студенташца.
«Студенташта дийцар агрокомплексо, промышленносто сага луча пайдах, къаьстта из болх а къахьегама Ӏалашон оагӀонаш а белгалйир цига. Предприятена эшаш ба ИнгГУ студенташ, цу даькъ тӀара дешар дийша йистебаьннараш. Уж ба агрономаш, химикаш, инженераш, механикаш, программисташ, экономисташ. Агрокомплекса компанена уж говзанчаш эшаш хилара бахьан да, 22 гектара тӀа керда теплицаш хьалъяь хилар», - аьлар «Сердало» газетага ГӀалгӀай паччахьалкхен университета зарбан болх лелабераша.
Карарча хана, «Шолж» яха агрокомплекс, Къилбаседа Кавказе помидораш кхеярах йоккхагӀа ярех цаӀ я. Укхаза хьалкхеду унахцӀена баьцадаараш: нарсаш, китайски кабуцаш, моажолгаш, кхыдола баьцадаараш. Компани шерлуш йоагӀаш хиларах, 600 балха моттиг хургья къахьегама даькъ тӀа.
