Молочанске «Ингуш-Регион-Строй» яхача оагIон болхлоша гIув яьккхар
Запорожски областа Токмакски кхален Молочанск яхача шахьара Мира оалача ураме артезиански гIув яьккхар. Из хоам «Сердалога» бир гIишлошъяра балхех йолча мехкарча министерстве.
«Министерство тIадилла, 2024-ча шера дIаболабир из болх «Ингуш-Регион-Строй» яхача оагIоно.
ГIишлон балхех йолча министерствон кулгалхочун гIонча вола Евкуранаькъан М. болх мишта дIабихьаб хьожаш хилар. Фирма болхлошца къамаьл даь, доазув совъяьннача нувхех цIенде аьнна тIадиллар цо», - йоах министерствера бенача хоамо.
Проекте къоастадаьр кхоачашдеш, 200 метрага кхоачаш гIув я цига Iочуаьхкар, ши плита оттаеш лард чIоагIяьй, иштта Рожновски гIалаш яха гIирсаш оттадаьд. Цул совгIа, насосаш оттаяь, из доазув чулоацаш, цу моттига тIабода никъ тоабеш чуберзабаь, видеокамераш оттаеш къахьийгад. 27 000 000 сом совгIа рузкъа да цу гIулакха дIадахийтар.
«Мала цIена хий доацаш, халача хьале бар цигара нах, дукхача хана денз. Цу гIулакхо дикка аттачахьа доаккхаргда цар хьал, хIанзчул тIехьагIа цIена хий хургда цар фусамашка», - белгалдир министра гIонча волча Евкуранаькъан М., цига дIабихьача балхах дувцаш. Карарча хана цу моттигаца дувзаденна дола каьхаташ кийчдеш ба цига, моттиг Iаьдала доале дIалургйолаш.
Цу моттиго ший болх дIаболабича, 24 сахьата 295 кубометрага кхоачаш хий луш болх беш хургья гIув. Цу гIулакхо дикка аттача доаккхаргда цIенача хих хьагаш бахача 2,5 эзар совгIа болча бахархой хьал.
