Гӏалгӏай мехка кийчлуш ба «Хьаькъале Магас-2026» яха чемпионат дӏаяхьа
Гӏалгӏай мехка, оагӏой бетта 10-ча денгара 13-ча денга кхаччалца, дӏахьош хургья «Хьаькъале Магас-2026» яха дукхача доакъоех латта чемпионат. Проекте дакъа лоацаш хургба уйла яра, чоалхане хаттараш кхоачашдара тӏакхувраш, тоабашца цхьана болх бе ховраш.
«Сердало» газетага, республикан кагирхой Комитете ма аллара, йоккхача яхьашка дакъа лоацаш хургба тоабашца цхьана хьаькъале хаттараш кхоачашде ховраш, цар цига таро я шоай хьаькъал хилар, сиха хӏама кхетадеш хилар гойта.
Из болх вӏашагӏбеллараша белгалду, цу ловзарашка керттера дакъа дӏалоацаш ба шоайла кхеташ бола доакъашхой, царна хов нийса дош дашха, цун маӏан кхетаде, лоаццача хана хаттар жоп дала.
«Хьаькъале Магас-2026» хургья кагирхошта дика масал гойташ, цига тоабашта юкъера доттагӏала бувзам чӏоагӏбергба.