Шодсанлатах йолча хьалхарча яхьашка кийчо еш ба республике
Шахбоксах, Шодсанлат яхача оагӀонах яхь дӀаяхьа лерхӀ хьатӀадоагӀача кӀира вай республике. Вай мехкадас Келаматанаькъан Махьмуд-Ӏаьлас хьаллоацаш; спортахи, физически культурахи йолча Министерствос дӀахьош ба цу оагӀонцара эггара хьалхара къовсам.
«Мужеча» яхача спорта кийчо еча вай мехкарча моттиге гуллургва Россера, Гуржий мехкара, Казахстанера, Таджикистанера, Эрмалой мехкара, иштта кхыйолча моттигашкара 40 совгӀа латархо.
Цу йоккхача кхетаченга хьажа вай мехка боагӀаргба спортахи туризмахи йолча казахий академен президент вола Закирьянов Кайрат, кӀалкхетаргах долча латара дерригача дунен федерацен хьалхалатта Ходжизаде Носим, боккхача мехкара цӀихеза спортсменаш, иштта кхыбараш а», - дийцар «Сердало» газетага шодсанлат яхача латара федерацен президент волча Сукенаькъан Махьмадгире.
«2016-ча шера ерригача Россе спорта тайпашта юкъедаха вай къаман латар спорте дикка доаржадара тӀехьа дӀахьош я из яхь. Цул совгӀа, дӀадахача шера къамий латарех долча дерригача дунен ловзарашта юкъедахад шодсанлат яха латар. Цо хьагойт, из кхыдолча латарашта тара доаржаде йиш йолаш долга», - белгалдир спорта оагӀонцарча министерствон хьалхалаттача Белхарой Руслана.
