ГӀалгӀайче кийчлуш я КИФ-2025 яхача инвестицей кхетаче дакъа лаца
ГӀалгӀайче, маьтсела бетта 25-ча денгара 27-ча денга кхаччалца, Къилбаседа Кавказа кхыча моттигашта нийсса, дакъа лоацаш хургья КИФ-2025 яхача инвестицей кхетаче, из дӀахьоргья «МинводыЭКСПО» гойтама центре. Цох дийцар ГӀалгӀай республикан Кулгалхочун, Паччахьалкхен зарбан болх лелабераша.
Кхетачен тема - «Инвестицей никъ: ДӀадахар. ХӀанзардар. Хургдар». Цох хила тарлу доалахьара къахьегам предпринимательства дегӀабоалабарца, халкъашта юкъера бувзам чӀоагӀбарца, экономика тоаярца, транспортаца, туризмаца, унахцӀенон оагӀонца дувзаденна хаттараш дувца керттера моттиг.
ГӀалгӀайчено ший лоархӀамегӀа йола инвестицей проекташ гойтаргья. Цул совгӀа, цо бартчӀоагӀам бе лерхӀ Ӏилма-технически, мах бара-экономически, культуран даькъ тӀа. Из дика накъадоалаш хургда республика дӀахо дегӀайоалаеча даькъ тӀа.
ГӀалгӀайчен Кулгалхочо Келаматанаькъан Махьмуд-Ӏаьлас, КИФ-2025 кийчонах дувцаш, аьлар: цу проекто Къилбаседа Кавказа хӀара моттига таро лу шийна карагӀдоалар гойта.
«Из да, тӀехь-тӀехьагӀа дукхагӀа а хулаш, керда таронаш хилар, керда юкъедоахаш дола кердадараш. Кхетаче гуш хул малагӀча даькъ тӀа из болх дӀабахьа йиш я, малагӀа царех хьаэца йиш я», - аьлар республикан Кулгалхочо ший бувзама оагӀонаш тӀа.
