Вай мохк кийчлуш ба, цӀена а хоза а мархаш даста
ГӀалгӀайче кийчлуш я бусалба наьха мархаш оала цӀай дӀадахьа; цудухьа тахан, цунга кийчо еш, хьалхара шоатта ди дӀадихьар. Берригача мехка юрташка лостам беш латт урамашка, наха салоӀача моттигашка, наькъий йистошка, дукхагӀа нах лелача моттигашка. Нах, хоза а хеташ, болабеннаб шоай юкъарча цӀагӀа лостам бе.
«Къахьегама шоатта ди - из нах вӀашагӀтохаш дола дика Ӏадат да. Из каст-каста бе лерхӀаш бола болх ба. Бакъда коммунальни гӀулакхерча болхлошта хьалхара бе безаш бац из. Моттигерча Ӏаьдало из дика кхетаде деза, шоай хӀара деннара болх хьа а беш.
Тахан ара мел баьннача наха баркал ала лов сона, уж ба вай мохк цӀенагӀа, хозагӀа хилча дика хетараш», - аьлар ший телеграм-канале ГӀалгӀайчен кулгалхочо Келаматанаькъан Махьмуд-Ӏаьлас.
Мархаш дастара цӀай хьатӀадоагӀаш, къахьегама шоатта ди дӀадахьар, из вай мехкахой барт а цхьоагӀо а хилар да. Цо хьагойт, вай цхьана хилча, дика толамаш даха йиш йолга, хьамсара ГӀалгӀайче хозагӀа хилийта вайна карагӀдаргдолга.
